Monday, 30 March 2015

Nuwe lewe

Dis nou byna een jaar wat ons op die berg woon... Ek was nog nooit so gelukkig en so tuis op 'n plek soos nou nie. Dis alles net omdat ons groot droom waar geword het. Om op Hogsback te kan bly!

Thursday, 19 June 2014

Nuwe afdraaipaadjie....

Ons groot droom het uiteindelik waar geword... Ons woon op Hogsback, een van die bes bewaarde geheime van Suid-Afrika!

Robin het my hierheen gebring vir ons wittebrood en my asem weggeslaan met die skoonheid van die natuur en die stilte en rustigheid van die dorpie weggesteek tussen die bome. Ek was totaal verlief op my nuwe man en die pragtige bergdorpie!

 En nou, amper agt jaar later is ons hier om te bly...  Ek wil myself nog dikwels knyp om te sien of ek nie droom nie!  Dat ons so ryklik geseend kan wees gaan my verstand nog te bowe!


Sunday, 23 June 2013

'n Paar blommetjies...



Sommer net....

As ek n goggamajolletjie was, het ek saans saam met die sterretjies gaan dans of vrolik en vry op die maan se hoepelrug gaan ry...
As ek 'n goggamajolletjie was, het ek in jou hemp se sak geskuil, kon jou stem my troos as ek wou huil...
As ek 'n goggamajolletjie was, het ek in die holte van jou hart gepas, het ek altyd net by jou gebly; ek by jou en jy by my...
As ek 'n goggamajolletjie was, het ons die aarde platgeloop, 'n huisie in die bos gekoop, skemertyd die pad gevat en mekaar in die bergpoel natgespat...
As ek 'n goggamajolletjie was, het ons blinkbruin klippies uit 'n waterstroom gehaal, paadjies vir die hart gebou om nooit weer te verdwaal...
As ek 'n goggamajolletjie was, kon ek stilletjies in jou ore fluister, kon ek elke dag met die son se groet 'n warm plekkie teen jou bors kom soek...
As ek 'n goggamajolletjie was, het ek 'n veer in jou hoed gedruk, blare en blomme vir ons huis gepluk, die wind se suissang om jou soos 'n jas gevou; sodat jy my vir altyd naby jou sal hou...
As ek 'n goggamajolletjie was, het ek saans 'n duisend kerse aangesteek, 'n tempel in die nag gebou en stil gebid vir liefde wat vir ewiglank sal hou..
As ek 'n goggamajolletjie was, kon ons in Kammalielieland woon, was die lewe eenvoudig en oop en die wereld van sy seer gestroop...

Maar nou is ek net ek en jy net jy
en die ver verlang sal net 'n jongmeisiedroompie bly...

Tuesday, 21 August 2012

My nefie Matthys, het my aan die skilder gekry met allerlei vrolike blomme! Iets wat ek nie gedink het ek het enigsins 'n aanvoeling voor nie. Ek moes 'n volle twintig blomskilderye vir hom maak en nou kan ek nie ophou nie! Skielik agtergekom ek kan dit doen!
Lekkertjies eet in die woud. Spesiaal geskilder vir my ousus Ansie en haar man Willie. Hulle is twee van die vele dierbare mense in my lewe wat my altyd aanmoedig en bemoedig om my talente te ontwikkel en gebruik: no matter what!!!!
Vrolike blomme in helder waterverfkleure!